【明報專訊】恒隆集團主席兼香港發展論壇召集人陳啟宗噚日搞咗個「體制改革﹕世界、中國、香港」研討會，佢雖然係主持人，但都有發表意見。陳啟宗鬧𠵱家社會討論議題時唔夠理性，形容係「文革式扣帽子」；佢又分析「民主嘅唔好處」，話民主會造成民粹主義，有民主就易引發財政赤字！ 話現社會「文革式」討論議題 預算案聽日公布，曾批評財政司長曾俊華係「大罪人」嘅陳啟宗，噚日唔肯評論預算案，但就同大家分析民主好與壞，佢話民主嘅好處係可以有權力制衡、有比較負責任嘅政府同有比較和平嘅政府更替。佢又用長篇幅分析「民主嘅唔好處」，話民主會造成民粹主義，令政府有財赤。佢引述國際貨幣基金組織嘅數據話，目前全世界20個負債最多嘅國家，「有19個係民主體制」，「點樣喺民粹主義抬頭、公共財政開支失衡之下仍然維持低稅率，呢個係要解決嘅」。 佢仲話反對派只想「執政、奪權」，將一切事件政治化，唔講道理，對人唔對事，「聲夠大就得」。但陳啟宗講這番話時，聲量都唔細。 劉迺強：公務員強勢令政府弱勢 同場嘅基本法委員會委員劉迺強都鬧埋一份，佢話公務員愈來愈強勢，搞到政府變得弱勢，令到立法、司法同媒體機構乘機「奪權」。佢又話香港法院唔應該過分涉足政治仲裁，而係要本地化作出合情合理合法嘅公正判決，「並非要爭取喺普通法地方嘅世界地位，唔係要維護西方嘅所謂普世價值，我哋維護香港嘅價值都維護不了，仲要維護人家嘅價值嗎？」
|
| |
| |
;){kind=small}
