【Emily】天氣轉蚊蟲增 環境局放「陷阱」
[2025.04.24] 發表
【明報專訊】近日天氣轉熱，多咗蚊蟲出沒。環境及生態局噚日喺facebook介紹食環署幾種滅蚊工具加強滅蚊，包括可以負載70公升滅蚊藥水嘅大型滅蚊機器，署方亦添置黑色嘅「蚊子陷阱」，令蚊子嘅卵唔能夠孵化成蚊，並研究利用機械狗去工作人員難以到達嘅地方滅蚊。
環境及生態局話，大型滅蚊機器可以負載70公升滅蚊藥水，並將藥水霧化，方便大面積噴灑，工友亦可以遙控操作，減輕工作負擔。
至於「蚊子陷阱」黑色桶，當雌蚊被吸引入去桶內產卵，桶內有生長調節劑令蚊卵無法孵化成蚊；由於雌蚊身上沾上生長調節劑，之後到其他積水產卵時，都會將生長調節劑帶到積水，令積水嘅幼蟲受影響，嗰隻雌蚊亦會感染真菌死亡。
食環署回覆話，而家有5部大型機械超低微量噴灑器，主要去難以抵達嘅地點滅蚊，例如草木茂盛嘅山邊，將來會視乎需要，安排全港使用。至於「蚊子陷阱」喺全港有2000多個，每套成本約200多元。
更多港聞
相關新聞
