【Emily】「花見大館」今起4天 有得DIY花樽乾花香薰燈

[2024.04.04] 發表

【明報專訊】春暖花開，中環「大館」以「花見大館」為主題，今日起一連4日喺大館檢閱廣場搞活動，現場設置本地品牌市集銷售植物同生活小物，包括季節限定有機蔬果、菜束花、多肉植物、以種子和樹枝設計嘅工藝品等。行到攰，附近輕食攤位有售賣以本地食材製作嘅氮氣冷泡咖啡、發酵茶、西式包點、素點心同曲奇。

市集另一亮點係3個花卉工作坊，參加者可以拼湊玻璃製作小花樽，或揀選自己鍾意嘅花材製成乾花香薰燈，現場有花藝師教授插花技巧同知識，帶領參與者創作花籃。同場亦展出由日本竹藝家松本破風以扁平竹片創作嘅立體竹藝作品。

為秉持可持續發展原則，活動過後(8日)大館設植物領養服務，開放時間為朝早11時至晏晝1點，市民到時可以帶心水植物返屋企栽種。

更多港聞

【明報專訊】李嘉誠基金會噚日公布捐助英國劍橋大學1100萬英鎊（約1.08億港元），支持早期癌症研究所嘅大樓重建，擴充實驗室空間、增加研究能... 詳情

【明報專訊】政府日前公布新一屆地區三會（分區會、防火會、滅罪會）名單，合共有2999人，三會嘅名單可以喺民政事務總署網站睇到。Emily留意... 詳情