【Emily】力銷沙頭角好去處 鄧炳強：將設電子禁區證
[2023.11.04] 發表
【明報專訊】新一份《施政報告》提到，除咗中英街，明年1月起會逐步開放沙頭角。保安局長鄧炳強噚日喺facebook提到，將引入電子禁區證申請，而每日簽發禁區證數目會增至1000個，方便旅行團同個人申請。佢又話會根據第一期開放後再評估，喺平衡當地居民不受打擾下，同時畀更多遊客去遊覽。
鄧炳強喺短片力銷沙頭角好值得市民探索，當地有保留咗廣州式騎樓風格嘅新樓街、鶴佬同客家兩種文化嘅天后廟、沿住避風港嘅海濱長廊，以及舊沙頭角消防局等；仲可以喺碼頭坐船來往鴨洲、吉澳同埋荔枝窩等外島。佢解釋，舊年開展嘅先導計劃容許指定人數嘅本地旅行團預先申請到訪，由於市民反應好及當地居民支持，故明年實施下一階段。
《施政報告》亦提到，第二階段開放沙頭角將喺明年上半年檢討成效同調節名額，保安局又會聯同文體旅局、深圳市政府，研究與深圳沙頭角發展文化旅遊區嘅可行性。
更多港聞
【Emily】孫中山誕辰 紀念館下周末免費同樂日
【明報專訊】11月12日係孫中山嘅誕辰，位於中環半山嘅孫中山紀念館將會喺下個周末一連兩日（11日及12日）舉行免費同樂日，會有唔同類型嘅活動... 詳情相關新聞
