【Emily】邵逸夫獎想增獎 促進國際合作
【明報專訊】唔經唔覺,每年向頂尖科學家頒獎嘅邵逸夫獎已經20年,獲獎嘅科學家逾100人。邵逸夫獎現時設有數學科學獎、天文學獎同生命科學與醫學獎,邵氏基金會主席陳偉文話,正研究增設獎項,希望兩三年內成事,新獎項嘅範疇暫未定案,但佢希望能涉及促進國際合作嘅項目,因為近年世界多咗對抗,容易忽略需要共同應對嘅問題。
初時無人識 得主以為詐騙
回想20年, 邵逸夫獎行政顧問邵詠儀話,最初成立邵逸夫獎嗰陣無人認識,雖然獎金有百萬美金,但發通知畀得獎者時,就曾經被人以為係詐騙,例如當年想聯絡一名俄羅斯得獎者,對方多次請佢哋食閉門羹,電郵唔覆,用電話傾兩句就收線,最後要搵同一範疇嘅學者協助聯繫,甚到去當地直接見面,對方最後欣然接受。
邵逸夫獎每年頒獎一次,今年有7名科學家獲頒獎項,其中香港成長嘅數學家丘成桐獲頒數學科學獎。頒獎典禮將喺今年11月12日於香港舉行。