【Emily】內地節目清唱幾句 容海恩練咗兩星期
[2023.04.22] 發表
【明報專訊】湖南衛視有唔少歌唱節目，最近新民黨議員容海恩(Eunice)就獲邀參與《我想和你唱》節目錄影，仲清唱咗幾句內地歌手汪蘇瀧嘅《有點甜》。睇番節目播出嘅片段，坐喺觀眾席嘅容海恩先接受主持訪問，主持就介紹本身係大律師嘅容海恩係香港立法會議員，仲話佢係「資深的大律師」。
至於點解會參與錄影，Eunice噚日同Emily講，事源佢本身識節目製作人，對方邀請佢參加，於是早前特登去湖南錄影，仲錄咗7個鐘，佢話相信自己係首個參與內地綜藝節目嘅立法會議員。佢又話當日並非即場開金口唱歌，事先已通知佢揀歌，仲練習咗兩個幾星期，不過錄影時仍然好緊張，仲自評有少少走音。
事後Eunice都喺facebook話，長沙嘅娛樂、動漫、文化產業發展好好，希望將來可促進湖南與本港嘅文化交流。
更多港聞
【明報專訊】2021年底成立嘅公務員學院，主要職責之一係安排公務員所需嘅培訓課程。學院計劃下月19日推出「不學詩，無以言」講座，只要係總薪級...
詳情
相關新聞
