【Emily】報業最佳新聞 明報奪14獎

[2023.03.18] 發表

【明報專訊】香港報業公會噚日公布「2022年香港最佳新聞獎」得獎名單，《明報》共奪14獎，包括2冠、2亞、2季及8優異。其中最佳圖片(新聞組)包辦冠亞，冠軍作品「執子之手，風中等候」拍攝時正值新冠疫情第五波高峰，公立醫院爆煲，鏡頭下捕捉咗兩個年老病人喺明愛醫院急症室外等待入院嘅互動。

得獎攝記鄧宗弘話，舊年初到唔同醫院採訪，大批長者露天輪候，天氣好凍，場景悲涼，醫護四處奔波，喺人手不足下盡力照顧病人。佢話無諗過香港會發生呢種事，好心悒，作為攝記要做個紀錄，而佢自己事後亦確診，相當辛苦，相信長者同長期病患者更甚。

明報嘅編輯亦有好成績，最佳標題(中文)5個獎，明報攞咗3個，包括冠軍「書就傳奇千萬字笑遊人間九十年」(報道倪匡逝世)、亞軍「商家問津留太白無人接手送珍寶」、優異「莫言說《莫言說》非莫言說」。

獲最佳新聞報道優異獎嘅「第五波疫情系列」，得獎記者陳柔雅話明報當時成立疫情小組，由一班同事專門跟進疫情新聞，第五波對大家都好深刻，大爆發初期防疫政策混亂，幾乎日日收到市民、醫護、院舍求助或報料，同事努力跟進線索發掘新聞，希望報道敦促政府改善政策。小組部分同事先後離職，佢想藉此多謝每個人付出嘅努力。

更多港聞

【明報專訊】馬來西亞華人楊紫瓊勇奪奧斯卡影后，旅遊發展局噚日舉行傳媒午宴，總幹事程鼎一透露之前搵過楊紫瓊宣傳香港，但因檔期問題未成事，不過知... 詳情

【明報專訊】天文台今個月換台長，今個星期展開退休前休假嘅鄭楚明前幾日已經去咗旅行，第一站係湖北省嘅恩施大峽谷，噚日喺facebook貼出幾張... 詳情