【Emily】帶幼園生參觀立會 邱達根：做議員最大挑戰

[2022.11.26] 發表

【明報專訊】立法會秘書處自11月起逐步恢復舉辦實體導賞團同教育活動，唔少立法會議員都會充當導遊，向學生團介紹立法會嘅工作。最近科技創新界議員邱達根(Duncan)負責同一班基督教香港信義會南昌幼稚園嘅K3小朋友介紹議員嘅工作，佢話遇上做咗立法會議員以嚟嘅最大挑戰。

Duncan同Emily講，佢問完啲小朋友知唔知議員要做咩後，全場「dead air」，最好笑有個小女生即刻推隔籬男同學，叫佢「講嘢啦」，搞到Duncan哭笑不得。

Duncan就介紹咗自己要負責討論法例，要開好多會，仲要同業界開會，但佢諗番轉頭，小朋友點知咩叫「業界」呢？Duncan都覺得自己講得悶，話好難有趣味咁講解議員做乜，仲話自己都唔識同6歲嘅囡囡講爸爸嘅工作，下次可能要問囡囡借啲故事書參考，試吓點樣用講古仔方式介紹議員嘅工作喇！

更多港聞

【明報專訊】為改善劏房兒童嘅學習環境，理大賽馬會社會創新設計院喺「置地公司家基金」捐助下，推行「童學習?置未來」計劃，幫劏房學童設計兼訂製2... 詳情

【明報專訊】6個立法會選委會界別補選嘅候選人，日前獲資審會確認資格，選舉事務處噚日抽籤決定各人嘅選票次序，依次係1號中大工程學院副院長黃錦輝... 詳情