【Emily】首戰東區龍舟賽 梁熙包尾有獎盃
[2022.09.26] 發表
【明報專訊】香港有防疫限制，明年嘅世界龍舟錦標賽都移師泰國，香港划龍舟只能「內循環」。噚日喺柴灣避風塘就有本地龍舟賽，民建聯立法會議員梁熙(右二戴墨鏡者)「首次下海」。梁熙話，呢項「東區龍舟競渡大賽」有成60年歷史，但因新冠疫情，2019年後停辦，地區團體一直爭取復辦，幾個月前團體同政府各部門一直商討，但政府一直無答，直至一個多星期前先話批准搞；雖然趕，但都辦得成，不過有啲隊伍及健兒就趕唔切參加，而活動只限參加者參與，仍然係無觀眾。
梁熙同Emily講，佢同地區人士、民政處職員組隊，鬥咗3場賽事，3場都包尾，但因為其中有賽事只有3隊出戰，所以都有個季軍獎盃當安慰。佢話大家只練習過3次，噚日都見到有翻艇等事故，佢哋能夠平安完成都算唔錯喇。梁熙話希望政府可以再放寬防疫限制，等各項活動可以復辦。
更多港聞
【明報專訊】社企「要有光」以「短貧戶」為服務對象，為他們提供可負擔住屋以及規劃未來路向。大學生文文因家庭問題離開所住公屋，2019年與母親搬...
詳情
相關新聞
