【Emily】譚鐵牛調任南京大學黨委書記 中聯辦暫5副主任 接替人未公布
[2022.09.24] 發表
【明報專訊】中聯辦高層有人事變動，根據國家教育部網頁，本身係中國科學院院士嘅中聯辦副主任譚鐵牛(圖)會調返內地，出任南京大學黨委書記，接替因年齡原因、不再擔任該校黨委書記嘅胡金波。不過Emily噚日睇番中聯辦網站，暫時仲顯示譚鐵牛係6名副主任之一，中央亦未公布接替人選。
譚鐵牛喺2016年底嚟香港，至今近6年，據Emily了解，佢主管教育科技同統戰，所以過去幾年不時喺教育、創科活動見到佢嘅身影，國家主席習近平今年七一訪港時，譚鐵牛都陪同到香港科技園視察。
來港近6年 主管教育科技及統戰
舊年7月中，美國財政部宣布新增制裁名單，當時嘅7名中聯辦副主任全部上榜，包括譚鐵牛，並註明係按2020年生效嘅《香港自治法案》作出制裁，其中楊建平、仇鴻喺2021年被國務院免職後，同年任命羅永綱做中聯辦副主任，如今譚鐵牛調埋去南京，即暫時中聯辦有5名副主任。
現年58歲嘅譚鐵牛喺西安交通大學畢業，之後去英國留學兼工作，1998年回國，喺中國科學院自動化研究所工作，做過中科院副秘書長、中科院副院長等。
更多港聞
【Emily】新任美領梅儒瑞完成3+4 開心出行
【明報專訊】新任美國駐港澳總領事梅儒瑞（Gregory May）上星期履新，雖然截至噚日港府仲未正式刊憲公布佢獲得中方認可，不過梅儒瑞一改上... 詳情
【Emily】參觀中大創業日 段崇智玩VR射擊
【明報專訊】中文大學創業日噚日起一連兩日舉行。校長段崇智噚日參觀創業項目互動展示區時，忍唔住戴上VR眼鏡玩一款「射擊電子競技」遊戲。佢喺開幕... 詳情相關新聞
