【Emily】環運會7大學推「可重用餐盒借用」
【明報專訊】叫外賣產生大量即棄餐具垃圾,環境運動委員會喺全港7間大學推出可重用餐盒借用服務先導計劃「ben don go!」,其中喺城市大學嘅計劃噚日率先推出,其後嶺南大學、教育大學、浸會大學、理工大學、中文大學及香港大學會陸續推行,最遲至11月結束。
有興趣參加者想借用餐具,可以喺校園內嘅指定服務點,用院校證件登記免費借用,或者用八達通畀20蚊按金。之後只要清空餐盒,毋須清洗就可以交返服務點,用八達通拎番按金。大學餐飲承辦商或環運會委聘嘅專業餐具清潔承辦商,會每日清洗及消毒用過嘅餐盒。
環運會希望透過先導計劃,鼓勵市民買外賣時自備可重用餐盒嘅習慣,減少使用即棄塑膠餐具,並為私營公司以及學校做示範,希望佢哋都推動提供類似餐盒借用服務畀員工及學生。