【Emily】議員試搭東鐵過海段 同炸彈殼「打卡」
[2022.05.07] 發表
【明報專訊】港鐵沙中線東鐵線過海段5月15日通車，多個立法會議員噚日試坐新線同參觀金鐘站及會展站，民建聯劉國勳特別感觸，佢喺社交媒體發文，話喺北區長大，睇住九鐵年代運行電氣化火車，到兩鐵合併，到今日東鐵線毋須轉乘可以直接過海，話自己見證鐵路踏上新嘅里程碑。
喺會展站擺放嘅戰時炸彈殼，成為議員「打卡」熱點，工聯會陸頌雄話會展站充滿藝術同歷史元素，值得一讚；新思維狄志遠都叫大家喺通車後過去睇吓，佢仲童心未泯，喺月台幕門與幕門之間位置擺咗個「大」字形pose。
建測規園界謝偉銓就話，噚日聯同多個立法會議員去參觀同試搭，果然又快又方便；佢特別有興趣會展站內有關東鐵(前稱九廣鐵路)發展歷史嘅展覽同介紹，同埋由1200幅不同時間、地點、天氣下拍攝嘅維港照片砌成嘅《水記憶》牆壁。
更多港聞
相關新聞
