【Emily】港大出片 宣傳醫學院疫下貢獻
【明報專訊】第五波新冠疫情仍然嚴峻,各界忙於抗疫,港大醫學院噚日喺網上發布影片,抗疫不忘宣傳,當中見到唔少熟悉面孔,例如醫學院院長梁卓偉、政府專家顧問袁國勇等。除咗佢哋,片段入面仲有接受採樣同打針訓練嘅醫學院學生、港大嘅研究人員等等。港大醫學院話,創立135年來同香港人見證多場疫症,喺𠵱家第五波疫情,醫學院師生同畢業生會守喺抗疫前線,守護港人健康。
港大醫學院喺片段提到佢哋多項抗疫工作,科研方面,醫學院積極搵出隱性傳播鏈,防止變異病毒株Delta大規模爆發。
至於疫苗接種,港大營運嘅港怡疫苗接種中心上月轉型為兒童服務,並增加接種額;港大又喺陸佑堂設立疫苗接種中心,優先為長者打針。觀塘彩福邨彩榮路體育館近期已改設成治療及暫託中心,港大醫學院都有派員支援。