【Emily】點解搞南沙港人子弟學校 CY自問自答
【明報專訊】全國政協副主席、前特首梁振英(CY)近年倡議喺南沙區高鐵慶盛站旁搞香港社區,佢牽頭搞嘅廣州南沙民心港人子弟學校,會喺9月開學,專收香港及非內地籍學生,用香港學制。CY噚日喺facebook解答辦學精神同理念。佢自問自答3個為什麼,講到點解係佢牽頭辦學,佢話做特首前做咗12年中學校董同大學校董會主席,投放嘅精力比做行政會議召集人仲多。
至於點解喺內地辦學,CY話係為可以結合香港同內地優勢。而喺內地辦港人子弟學校,佢解釋因為長期以來內地冇香港學校,認為呢個係香港融入國家發展大局嘅障礙。
佢講到呢間學校係非牟利,家長唔需要買債券。根據報道,學費分小學、初中、高中,由9.8萬至13.8萬人民幣一年不等,用嚟支付學校經常營運開支。CY話辦學精神係「身教學生」,理念係培養港人子女嘅「香港根,中國心,世界觀,大格局」。