【Emily】被問黨友EQ學歷 李世榮：佢親身讀返嚟
[2021.12.14] 發表
【明報專訊】民建聯葛珮帆(EQ)嘅「博士」學歷一直係網民焦點，喺立法會新界東南參選嘅民建聯李世榮噚日出席now新聞台嘅選舉論壇，亦被網民問及佢今次參選話要接葛珮帆嘅棒，咁點睇葛珮帆嘅學歷有冇誠信問題？
李世榮最初回應話EQ有碩士學位，「對佢嘅學歷我覺得係無誠信問題」，叫大家千祈唔好扭曲事實，要睇番事實真相。主持人追問網民關注嘅係EQ嘅博士學歷喎，李世榮就話EQ過去已經解釋咗，「佢真係自己親身讀書去讀返嚟」，大家都經歷過讀書咁辛苦，千祈唔好詆毁年輕人同成功讀書嘅朋友仔喎。
送禮環節上，獲報稱「基層民主派」嘅蔡明禧送「柿」嘅李世榮，除咗反送對方一支「立即現形藥水」，質疑對方政治立場，喺質詢蔡明禧時更一度指住地下話，「等等先，蔡仔，你跌咗嘢呀，你跌咗你嘅良心同原則呀，你搵唔番㗎嘞」，大數蔡喺2019年「黑暴」勢頭好時黐埋去，到《港區國安法》落實後又效忠《基本法》，更指「你唔使搵喇，搵唔番㗎喇」。被質疑嘅蔡明禧就持續大叫「民建聯最無恥」。
至於專業動力林素蔚，有網民就話宣傳橫額相片同真人有落差，質疑係咪P圖呃市民？林解釋，經歷個幾月朝六晚十選舉工程後，「人都清減咗」，強調橫額張相係佢本人，叫大家唔使擔心。
葛珮帆為選委會界別候選人，該界別51人參選，名單詳見明報網站選舉專頁(bit.ly/30iscHA)。
更多港聞
【Emily】憶一起瘦過的日子 狄志遠謝李華明撐場
【明報專訊】立法會選舉社會福利界候選人、新思維狄志遠日前獲民主黨元老李華明出席活動撐場，不過李華明無獲民主黨批准，仲話有心理準備被處分；獲老... 詳情
【Emily】少去傳媒論壇 地建界龍漢標中環街市派政綱
【明報專訊】立法會功能組別地產及建造界選舉，多年來首現競爭，由地產建設商會秘書長龍漢標與卓能集團執董趙式浩對撼，不過呢個界別未見熱熾選舉氣氛... 詳情
相關新聞
