【Emily】工聯會智庫倡增官員幕僚 麥美娟:唔係為我哋搵出路
【明報專訊】《施政報告》提出重組政府架構,工聯會麥美娟(Alice)成立嘅智庫「治港新政」噚日提出3項建議,以提升政府管治效能,包括增加問責官員嘅幕僚團隊,負責政策游說、研究、宣傳、公關等。被問係咪有意推舉智庫或工聯會成員加入政府,佢強調「呢個係治港新政嘅政策建議,唔係為我哋自己搵出路」。
話無人做研究或致政策離地
Alice話目前嘅局長辦公室裏面有一個副局長、一個政治助理,形容係「有人做文件,無人做研究」,政策研究或要「外判」,最終導致政策「離地」,追唔上社會變化,所以建議撥款加開一定數目嘅編外職位,等各局長可以建立「幕僚團隊」。
至於治港新政會否加入做幕僚,Alice重申呢個智庫旨在凝聚各階層,成員有唔同才能,「如果有一日被政府物色,邀請佢哋加入政府,我哋都完全唔會奇怪」。治港新政嘅其他建議包括改善創新辦架構,將領導職位改成「公務員或非公務員職位」,進一步吸納外界人才。