【Emily】穆家駿主管青民聯宣傳公關
【明報專訊】民建聯穆家駿(圖)早前喺東奧期間,批評港隊羽毛球「一哥」伍家朗嘅黑色波衫,釀成公關災難,引起軒然大波。新一屆青年民建聯委員噚日見記者,穆家駿連任副主席,並主管宣傳公關,但佢噚日就冇現身記者會。被問到點解由穆家駿負責宣傳公關,青民主席施永泰解釋,有經過自薦、內部挑選等程序,「穆sir係一個比較出名嘅KOL,佢做緊一個YouTube channel講中國歷史,以及佢嘅微博都有大量followers(追蹤人數)」。
黨友信穆sir可反思波衫風波
波衫風波後,穆家駿有一段時間冇公開露面,噚日青民話佢要上網課讀書,所以未能出席記招。被追問球衣風波嘅後續,另一副主席鍾健峰就話,「每個人嘅成長都有一定嘅經歷,相信穆sir都可以透過嗰件事,不論係好定唔好嘅一面,可以反思自己嘅行為……的確穆sir過往引發一場小風波,呢個係毋庸置疑」,但話青年最重要係勇於承擔責任,相信對方會為青民帶來好嘅發展。
本屆青年民建聯委員有27人,較上屆增加4人;委員平均年齡係27歲,低於過往超過30歲,施永泰話希望更能代表青年聲音。