【Emily】智破犯罪集團 好市民獎得主親身「案件重演」
[2021.08.16] 發表
【明報專訊】警方上周六(14日)頒發好市民獎，噚日喺facebook上載部分好市民獎得主嘅案件重演，由好市民、吊車司機鍾先生親自演繹當日如何智破賊人犯案手法，點樣記錄低賊人資料，幫助警方破案。警方呼籲市民要向鍾先生學習，時刻保持警覺。
運貨頻轉場 要求抄對方資料
案件重演影片中，鍾先生收到客人電話，話有貨要運，對方原先話係爛鐵，但到現場發現係可用嘅大型器材。對方上到車，又話唔係原先落單嘅目的地，要轉到橫洲停車場，然後又轉到沙頭角。鍾先生覺得對方有古怪，要求抄低對方資料，話因為多次轉地方，要向公司交代，最後影低賊人身分證。警方喺鍾先生協助下搗破一個犯罪集團，其中兩個人被判搶劫罪成，分別判監28同37個月。
兩賊搶劫罪判28同37個月
鍾先生喺片中分享，案發嘅時候已經係深夜，對方不斷轉地點，神色緊張，所以覺得有可疑，問對方拎多啲資料，日後萬一有咩事都可以追究；點知對方啲貨原來真係偷番嚟，警方搵佢協助調查便一口答應。
鍾先生話，幫到人嘅感覺開心，最緊要係失主可以搵番佢嘅貨，呼籲同行若收到有人要求幫手處理可疑貨品，應該提高警覺。
更多港聞
【Emily】子承父業做渠署 電氣督察闖出一片天
【明報專訊】建造業議會早前舉辦第二屆「建造業傑出青年選舉」，揀咗5個來自建造業不同崗位嘅傑青。發展局長黃偉綸邀請其中兩人拍片對談，噚日喺網誌... 詳情
【明報專訊】勞工及福利局長羅致光噚日以「貧富懸殊之影響收入分配政策」為題寫網誌，佢話一個政府若要影響收入分配，唔能夠只依靠巿場運作，產業、勞...
詳情
相關新聞
