【Emily】葉劉談港人追捧男團 「有啲以港人為傲嘅嘢」
[2021.07.26] 發表
【明報專訊】男團MIRROR及ERROR人氣高企，新民黨主席葉劉淑儀都多次提起佢哋。葉太噚日上商台節目時，被問政府應該點樣修補社會撕裂，佢話要「爭取年輕人嘅心」，見到最近有市民追捧男團，「(市民)嘅情緒都要有啲出路，即係覺得有啲以香港人為傲嘅嘢，搵番自己嘅偶像，都有啲(情緒)發泄」，話政府唔可以忽視。
話解決撕裂 唔應該只靠執法
節目主持問佢，香港係咪要繼續維持高壓管治，政府日後係咪要做實事、民生工作等，葉太回應話「特首咪請我哋睇(東京)奧運，都係一個招數，短期內有啲嘢開心一下……最近抽獎、消費券都引起一啲熱潮」。佢認同解決撕裂唔應該只靠執法，現時強力執法令反對力量「潛咗水」，政府未來仍然要留意點樣團結方方面面。
講到政府管治，港澳辦主任夏寶龍早前提出對治港者嘅5項要求，葉太話就算表面上達標，「都要做過至知，你睇過往4位特首嘅CV(履歷)都亮麗，表面都係好優秀，選委會都滿意」。佢話香港情况複雜，中央要搵個自己信任、立場很堅定嘅治港者，而擔任公職嘅港人都應該努力爭取達標，「但任何人都要做過至知」。
更多港聞
相關新聞
