【Emily】《不割席》落選 最佳紀錄短片導演：香港示威者不會被遺忘
[2021.04.27] 發表
【明報專訊】今年未有香港電視台轉播嘅奧斯卡頒獎禮，備受港人注目，皆因講述前年反修例風波嘅短片《不割席》(Do Not Split)有份角逐。《不》最終鎩羽而歸，不過憑住Colette獲頒最佳紀錄短片嘅導演Anthony Giacchino致謝時，就提到其他入圍作品，佢話紀錄片令當中人物嘅記憶、勇氣同堅韌，包括也門嘅無辜兒童、香港嘅示威者等等，都唔會被遺忘(...the innocent children of Yemen and the protesters in Hong Kong are not forgotten.)。
Colette由英國《衛報》發行，去年11月為紀念紐倫堡審判75周年而喺該報網站及YouTube頻道上架。該片講述二戰時曾加入法國反抗軍嘅Colette，去到其兄長遇害嘅集中營，過去佢一直拒絕踏足德國，但一名年輕歷史系學生改變咗佢嘅想法。
對於Anthony Giacchino嘅感言，因反修例運動而成立嘅「攬炒團隊」喺Twitter表達恭喜，並感謝《不割席》導演Anders Hammer，令「香港人」可以喺奧斯卡歷史上留下印記。
「趙婷」成禁語 羅冠聰嘆「郁吓就辱華」
除咗紀錄短片，唔少人都關注奪得最佳電影、最佳導演及最佳女主角嘅《浪跡天地》，導演趙婷曾因為喺訪問中話中國充斥謊言而被批「辱華」，噚日微博等社交媒體上，「趙婷」亦成禁語。立法會前議員羅冠聰慨嘆，「郁吓就『辱華』，呢個『大國』真係自卑得可憐」。另一前議員梁繼昌就形容《浪跡天地》係一部好美國嘅電影，大讚趙婷同另一著名導演李安各自精彩，「前途無可限量」。
更多港聞
【Emily】人權新聞獎 明報再膺一人一票最佳圖片獎
【明報專訊】今年「人權新聞獎」嘅「一人一票最佳新聞圖片獎」競爭激烈，Emily收到風結果已經出爐，由《明報》攝影記者馮凱鍵嘅《年少的兄妹》（... 詳情
【Emily】黃大仙祠財神宮 畀100元可為神像貼金
【明報專訊】嗇色園100周年紀慶，喺黃大仙祠有新建設，噚日就為財神宮搞開幕儀式，仲舉辦財神貼金活動，信眾可以畀100蚊領一張足金金箔片，為財... 詳情
【Emily】改建荃灣海濱公園 康署擬引入嬉水沙池區
【明報專訊】康文署計劃改善使用約20年嘅荃灣海濱公園同荃灣公園，噚日向荃灣區議會先介紹首階段工程，其中會先推行改善荃灣海濱公園工程，包括會改... 詳情
相關新聞
