【Emily】周末加班 官員再落區收簽名
[2021.03.15] 發表
【明報專訊】人大修改香港選舉制度，建制派連日喺各區擺街站收集簽名支持，多名官員唔止喺網誌表態，早前先後去建制派街站簽名，部分官員周末仲做埋「義工」，再度現身唔同街站呼籲市民簽名，甚至一日內現身唔同街站，其中創新及科技局長薛永恒噚日就去咗香港青年聯會同民建聯葛珮帆嘅街站。
教育局長楊潤雄早前去咗「九龍東潮人聯會」街站簽名，噚日亦一身便服去到教聯會喺太子嘅街站。楊潤雄喺facebook話感謝教育界同工身體力行，支持完善制度，並推動學校做好國情國安教育，話深信大家今日嘅努力，可以幫香港未來培養更多治港人才。
網站話逾50萬人簽名
保安局長李家超繼前日去咗葛珮帆街站後，噚日就同副局長區志光、政治助理劉富生，去咗民建聯陳克勤喺粉嶺嘅街站。陳克勤facebook形容，李家超親自呼籲市民簽名，並同市民交談，了解地區民情脈搏；區志光簽名之餘，亦積極邀請路過街坊簽名。發展局長黃偉綸噚日就到新民黨喺大埔墟嘅街站。根據收集簽名嘅網站話，截至噚日傍晚6點半，有逾50萬人簽名。
更多港聞
【Emily】屯馬線模擬「尿袋」冒煙 演習疏散
【明報專訊】港鐵屯馬線今年稍後時間投入服務，港鐵噚日凌晨做救援演習，模擬列車行駛期間發生事故，以測試緊急應變部署同程序，港鐵、消防處、警務處... 詳情
【明報專訊】建制派除咗叫人簽名支持人大修改選舉制度，近日亦發布唔少民調話好多市民支持改制。新民黨立法會議員容海恩噚日舉行記者會，公布「民眾聯...
詳情
相關新聞
