【Emily】海天客運碼頭全用「無人拖車」
【明報專訊】無人駕駛車輛目前未可以喺市面行走,但赤鱲角機場禁區範圍內,其實已有無人駕駛車輛應用。機場嘅無人駕駛車輛,其實係拖貨拖車(圖),2019年12月30日投入服務,係全球第一部喺機場實際環境操作嘅無人駕駛拖車。機管局話無人駕駛拖車去年10月起擴展服務範圍,來回海天客運碼頭同一號客運大樓行李處理大堂,為飛機轉搭快船或快船轉搭飛機嘅旅客運送行李。
機管會拍片介紹無人駕駛拖車,車頂上配備準確度為誤差約10至15厘米嘅差分全球定位系統,車速為每小時20公里。拖車旁亦設有兩組、共8部高清攝影機,亦配備3個光學雷達,確保安全同穩定性。機管局機場運行副總監-運作及服務姚兆聰話,任何物品喺拖車10米範圍以內,拖車會立即煞停。
姚兆聰話機管局用咗超過一年半試驗無人駕駛拖車,證實運作可靠,亦較傳統以人手駕駛拖車更安全及暢順,所以喺今年第一季,行走海天客運碼頭嘅行李拖車全部改為無人駕駛拖車,取代傳統人手拖車。