【Emily】民記徐英偉拍片 籲全民檢測僱主幫手

民建聯立法會議員張國鈞（左）同民政事務局長徐英偉（右）等拍片，話要逐一擊破全民檢測嘅陰謀論。（張國鈞fb短片截圖）

【明報專訊】民建聯立法會議員張國鈞噚日喺facebook上載短片，邀請民政事務局長徐英偉講解「普及社區檢測」計劃。被問檢測會唔會導致人群聚集同增加感染風險，徐英偉話全港多區都有採樣站，亦要求市民先上網做預約分流，避免人群聚集，「例如返工嘅，我哋都希望到時僱主可以彈性咁，讓佢哋(僱員)出嚟做測試，令大家都安心」。

至於檢測會唔會將市民嘅DNA「送中」，徐英偉話個測試根本冇辦法攞到DNA，叫市民唔使擔心。佢話所有測試都會喺香港做，資料唔會送到香港境外，並會喺完成檢測後一個月內銷毁；如檢測結果呈陰性，當局會發短訊通知市民。

多區將會設立檢測中心，徐英偉話市民外出時絕對唔使兜路避開，指當局問過衛生署意見，確保中心內唔會有感染風險，呼籲市民盡快做檢測。佢話過去咁多個月嘅疫情反映，大家需要搵到啲隱蔽患者，並切斷傳播鏈。張國鈞最後呼籲政府用多啲唔同嘅宣傳方法，同市民解釋檢測流程，等大家明白多啲細節。