【Emily】范國威區諾軒各獲立會31萬特惠金
【明報專訊】立法會前議員范國威同區諾軒2018年3月循補選晉身議員,及後因選舉呈請案被法庭裁定「非妥為當選」,去年底喪失議員資格。立法會行政管理委員會決定,按照佢哋出任議員嘅時間,酌情向兩人發放特惠金,每人可獲發大約31萬元,相等於佢哋收取嘅議員薪酬15%。
追3泛民清潔費 工作開支抵消
至於早前被指喺立法會投擲惡臭物嘅民主黨許智峯、人民力量陳志全同議會陣線朱凱廸,行管會繼續向3人追討清潔等費用。睇番資料,許智峯要畀5.2萬元,另外兩人要畀不少於10萬元。行管會主席梁君彥話,許智峯無回覆欠款一事;陳、朱兩人就有唔同嘅提問,秘書處會進一步解釋費用嘅計算方法。行管會指示秘書處,以3人未發還嘅工作開支抵消欠款,同時暫緩處理佢哋嘅開支償還申請,直至欠款還清。
另外,行管會將繼續向青年新政梁頌恆同游蕙禎追討薪酬津貼共186萬元,梁君彥話代表律師會聯絡游蕙禎,希望能夠達成協議;但梁頌恆無理會追討,行管會決定向佢提出破產申請。