【明報專訊】唔少區議員、政黨中人都喺疫情下幫街坊訂購口罩，部分食品如米類近日都引起搶購。新民黨海怡西前區議員陳家珮前日喺facebook出post，話可以幫街坊團購泰國米，仲加埋「#同心協力、全民抗疫」呢個標籤。有網民就留言叫佢「唔好周圍引起恐慌啦」，質疑係咪想「引阿毛搶米？」，亦有人想佢幫忙團購口罩。

陳家珮同Emily講，一向都有做開幫街坊團購泰國米，一年4次，今次係有街坊同佢講區內嘅超市米架近日長期空晒，冇米買，向佢求救。佢話，區區都有唔同區情，而海怡區內就缺米，佢打去平時訂開米嘅供應商度問，對方解釋有貨喺香港，但因為新春假期唔夠司機，送唔切貨。

對於有人批評係引起恐慌，陳家珮強調唔會冇米供應，只係遲啲到，叫街坊唔需要搶。佢噚日開始畀街坊購票預訂米，一人限購3包，下星期內送貨，佢話開賣頭兩個鐘街坊已經訂購咗100包米，反應好踴躍。