上節目談退黨 卿姐鬧區諾軒：衰仔成日想走

區諾軒（右）噚日接受民主黨前主席劉慧卿（左）訪問，區話自己雖已退黨，但好多謝民主黨胡志偉同涂謹申喺議會內提點佢。區又話，自己上任立法會議員已經大約兩個月，「好開心又講唔上」，因為喺議會內有時會好「火滾」，特別係官員答問題答得好差嘅時候。（《議會內外》截圖）

【明報專訊】民主派立法會議員區諾軒去年退出民主黨，佢噚日接受民主黨前主席劉慧卿訪問，大談退黨原因。佢形容自己係屬於「砌」嘅路線，加上進步民主派被打壓得厲害，「基本上係被剝光豬」，所以自己想去幫進步民主派一把。佢仲話，當時諗咗好耐係咪要退黨，卿姐聽到就話：「衰仔，成日都想走。」至於會唔會參加下屆立法會選舉，區話：「Never say never(永不說不)。」但就話講呢個問題真係言之尚早。

卿姐喺網台節目《議會內外》單刀直入，問區諾軒舊年9月退黨，係咪準備參選(立法會補選)，區否認，強調退黨同參選係分開嘅事件，指離開民主黨係因為覺得自己專長係「砌」，因此希望協助進步民主派。區又話，去年11月、12月左右，民主動力開會討論如果眾志唔入閘嘅問題，當時眾志先搵區諾軒討論代替人選方案。

不過，卿姐聽到進步民主派𠵱這幾個字就反問，「民主黨係退步路線？」仲叫區要小心字眼。區立即補鑊話「民主黨都有進步嘅地方」。

區諾軒話，好多眾志嘅朋友喺佢嘅辦事處工作，「區諾軒就係區諾軒，眾志就係眾志，我嘅立場係可以同眾志唔同」。佢又話，同眾志喺主權問題上立場有分別，佢覺得係港人決定自己嘅未來選項上，可以無港獨選項。佢解釋「香港人有權決定自己嘅未來」呢句話係無錯嘅，但好遺憾《基本法》下係無港獨嘅選項。

更多港聞

「朋友 要創作隨時被控告」 國歌法公聽會收惡搞意見書

【明報專訊】立法會政制事務委員會今日又再舉辦國歌法公聽會，畀公民人士同各個民間組織表達意見。立法會亦已經收到唔少意見書，有唔少人仲將惡搞國歌... 詳情

3000人聯署撐許智峯

【明報專訊】民主黨立法會議員許智峯早前喺立法會大樓內奪去政府人員手機，引起極大爭議。民主派多個民間組織發起聯署支持阿峯，明言阿峯已經致歉，唔... 詳情

天虹學生仔度橋 助斑鳩校內安居

【明報專訊】浸信會天虹小學電腦室外近日出現不速之客，原來有斑鳩喺3樓天花築巢孵蛋，職員向副校長報告後，靈機一觸，請咗高小嘅同學仔為呢位「住客... 詳情