3000人聯署撐許智峯
[2018.05.05] 發表
【明報專訊】民主黨立法會議員許智峯早前喺立法會大樓內奪去政府人員手機，引起極大爭議。民主派多個民間組織發起聯署支持阿峯，明言阿峯已經致歉，唔應該剝奪佢嘅議席，𠵱家已經有約3000人聯署支持，其中一個聯署人叫「陳學鋒」，同民建聯中西區區議員同名同姓，但相信係兩個唔同嘅人，民記陳學鋒喺社交網體留言仲踩多腳話，「我點會撐搶劫犯」。
民主派嘅聯署話阿峯係民選產生，議席唔可以隨意剝奪，呼籲所有立會議員要尊重選民，唔好因黨派利益而任意取消個別議員嘅資格。
建制派方面，新民黨立法會議員容海恩同工聯會早前都分別發起聯署，要求立會譴責阿峯嘅暴力行為，批評阿峯嘅行為係對女性極大侮辱，要為受影響嘅女政府人員取回公道。一個名為「新年代」嘅團體噚日拎埋國旗去立法會抗議許智峯，一班建制派議員仲去撐場支持。
更多港聞
相關新聞
