【明報專訊】特首林鄭月娥噚晚出席港區省級政協委員聯誼會第6屆理事會就職典禮時，透露將會喺下個月親自帶團去四川，仲會首次召開川港高層合作會議，又會去探望中聯辦前主任、現任四川省委書記彭清華，仲形容彭清華係「好朋友」。

或赴川震10年紀念活動

Emily聽聞林太會喺下月上旬赴四川，此行係商界團為主，主要會去成都。林太今次出訪撞正5．12汶川大地震10周年，當年地震發生後，香港政府及賽馬會合共出資逾100億港元，支援當地救援及災後重建工作，時任發展局長嘅林太曾負責處理香港支援川震災後嘅重建工作，仲同義工去過災區考察。

據了解，林太此行去四川或者會參與汶川大地震嘅紀念活動，而有關方面正安排林太參觀當年香港援建川震重建項目。

林太對上一次去四川係喺2016年5月，時任政務司長嘅佢率團視察災後重建進度，仲去咗四川卧龍自然保護區探吓大熊貓。不過，林太今次出訪四川活動以成都為主，未必會去臥龍探熊貓，因為位置比較偏遠。