【明報專訊】立法會補選3月舉行，喺前年換屆選舉落敗、一直盛傳會捲土重來出戰「建築、測量、都市規劃及園境界」補選嘅謝偉銓(Tony)，噚日向傳媒發邀請，透露今日會正式宣布參選。前年選舉因為建制派兩人鷸蚌相爭，令民主派姚松炎漁人得利；對於今次補選可能同司馬文單對單交手，勝算會唔會增加，Tony噚日同Emily講，話唔作假設，但會爭取選民支持。

Tony以「團結 專業 監察 邁進」做競選口號，佢唔評論與司馬文比較有咩優勝之處，政綱會留番今日公布，但就話近期不斷接觸業界人士，得到好多有建設嘅意見。Tony近期活躍於facebook，包括推出活化工廈同要求政府批出更多工程畀中小企嘅短片，唔知呢啲短片吸唔吸到選票呢？姚松炎已報名參選九龍西，同區對手有民建聯鄭泳舜。