新關長聲帶有事 要做手術戒奶茶
[2017.08.05] 發表
【明報專訊】新政府上場「滿月」無耐，唔少新官一上任就即安排同傳媒見面，而打破AO空降海關局面嘅新任海關關長鄧以海，噚日有機會同傳媒聚聚。Emily發現佢氣虛聲沙，講嘢就住就住，原來佢聲帶有問題，遲啲仲要做手術醫治！
鄧sir話，7月上任後要去比利時布魯塞爾公幹，出席世界海關組織會議，其間一直無事，點知返港後無耐聲帶就出事，所以一直唔敢露面，希望養番把靚聲先見記者，可惜康復進展好慢，仲話遲啲要做手術割繭或瘜肉，可能要禁聲休養一排，「如果要等到好番晒，都唔知要等到幾時」，就唯有爛聲都同大家講吓佢未來工作目標。
鄧sir話，對佢嚟講最辛苦唔係要就住把聲，而係醫生要佢戒咗佢最鍾意飲嘅奶茶，鄧sir話佢高峰時可每日飲三四杯，𠵱家唯有每日淺嘗半杯頂癮就算。
更多港聞
相關新聞
