掃「黃」vs.撐毓民 支持者互罵 前「愛徒」數毓民不是

掃「黃」vs.撐毓民支持者互罵前「愛徒」數毓民不是

[2016.08.25] 發表

【明報專訊】近日九龍西地區直選論壇除咗場內激辯充滿火藥味，場外更有火爆衝突。號稱要「掃黃」嘅九西候選人何志光，其支持者前晚喺論壇外，同黃毓民支持者對罵，引嚟大批警員。何志光話支持者只係諷刺黃毓民幾句「純口部動作」，點知對家就「吹雞」話要「守護教主」；熱血公民首領黃洋達反駁話，因為要還以顏色，所以號召近百支持者到場聲援。

何志光參選係為咗狙擊黃毓民，何前晚仲搵咗曾被稱為黃毓民「愛徒」嘅任亮憲作代表發言，怒斥黃毓民不是，仲多次高呼「一票不投黃毓民」。

何志光﹕不滿變永續基本法割蓆

本土派之間嘅恩怨相信講3日3夜都講唔完。原來何志光曾經係黃毓民支持者，何多年前仲喺社交網站撰文反駁批評黃毓民嘅人。何亦曾喺黃毓民創辦嘅MyRadio網台做主持，但做咗3個月唔夠就辭職，後來仲同黃毓民割蓆。何志光同Emily講，割蓆係因為不滿黃毓民支持城邦派人士，以及立場由燒《基本法》變成永續《基本法》。

前晚有線電視喺九龍城兆基創意書院舉行九龍西選舉論壇，何志光引述支持者話，開場前已有十幾名「花生台」聽眾同何嘅支持者喺門外等候入場，見到黃毓民時就諷刺幾句，「但只係口來口往，(何志光)支持者無上前阻黃毓民入場」。完場後，何志光等人離開時，就被近百名熱血公民成員圍罵，其間嚟接何嘅車都被劃花。

黃洋達﹕幾百友只係先頭部隊

熱血公民首領黃洋達事後亦喺社交網站講解經過，佢話論壇前有人對黃毓民起哄，「毓民就話叫我們還以顏色」，所以就「吹雞」聲援。黃洋達仲話「幾百友只係先頭部隊」。《熱血時報》報道話，十幾名社民連前主席陶君行創辦嘅花生台人士，騷擾黃毓民。消息傳出後，過百名熱血公民同「熱普城」(熱血公民、普羅政治學苑、城邦派)支持者到場聲援黃毓民。事件演變成黃毓民聲援者同警方發生衝突，警員要出胡椒噴霧。九龍西其他候選名單見附圖。