舊牀捐志願機構 科大換牀唔做大嘥鬼

【明報專訊】大學生每逢搬hall(宿舍)總會掉棄一大堆新簇物品，不過有幾多個會垃圾分類或者將仲用得嘅嘢捐出去？香港科技大學學生宿舍近日就為咗換新牀，計劃掉300張用咗近20年嘅舊木牀，但就事先聯絡志願機構，消息發出後唔使一個月，木牀悉數畀機構認領晒，唔使送去堆填區喇！

科大趁仲有半個月開學，翻新一吓校內設備，包括學生宿舍，仲話因為木牀用咗成20年，就趁翻新換埋佢，張牀3呎半乘6呎，係標準單人牀size，睇相仲幾新淨添，而且木造非常耐用。科大話咗響應環保，自上個月起就主動聯絡志願團體問佢哋要唔要牀，都得到唔少查詢。Emily聽聞，有志願團體要咗過百張牀，將會送去外地畀有需要嘅人。

大學間唔中搞完大型活動或搬hall之後掉一大堆垃圾，唔少睇上嚟仲幾新淨，大家下次掉嘢前不妨諗吓可唔可以重用、有冇人會用得着，再唔係上facebook問有冇人要，避免做「大嘥鬼」！

更多港聞

「電鑽大王」鍾志平任MPF行業計劃委會主席

【明報專訊】港府現設有強積金行業計劃委員會，負責監察強積金行業計劃，行業計劃係為建造業同飲食業呢兩個高流動嘅行業設立，呢兩個行業嘅僱員轉職時... 詳情

電腦節開幕 主禮楊偉雄「釣魚」

【明報專訊】一連四日、喺會展舉行嘅電腦節噚日開幕，噚日中午嘅開幕典禮，邀請咗創新及科技局長楊偉雄（前排中）、行政會議成員鄭耀棠等做主禮嘉賓。... 詳情