【明報專訊】亞視日前「熄機」，坊間卻未忘亞視。曾經參選亞洲先生嘅鄧簡文(圓圖)，噚日喺港台《城市論壇》於台下發言，一邊大讚亞視，更趁機向出席嘉賓ViuTV總經理魯庭暉自薦，「希望魯生、ViuTV嗰度，遲啲搞ViuTV先生呢，考慮吓小弟」。

鄧簡文話亞視掙扎求存嘅精神值得學習，仲話亞視曾經「缺水缺糧、換過老細，到今日呢佢仲永不言死，甚至上埋太空𠻹，我覺得應該將亞視申請去聯合國非物質文化遺產」。講者嘉賓魯庭暉喺台上就回應話，「其實你搵我係無用嘅」，因該台運作屬由下而上，「同事覺得點呢係最重要」。佢話只靠幾個人傾，創意唔夠多，需要全公司甚至業界去做。