【明報專訊】西貢區議會喺1月開咗第一次大會，仲通過咗一項會議常規嘅修訂，話之後嘅委員會會議紀錄都會以不記名方式寫低，喺主席吳仕福投贊成票之下，就以1票之微通過。有投反對票嘅議員同Emily講，覺得議會倒退；但都有議員話，過往有議員嘅言論成日重複，精簡扼要都係好事。以後喺西貢區議會會議裏面，區議員方國珊同范國威講咗啲咩，大家就不得而知喇。
Emily了解，有西貢區議會議員認為過往會議太長，秘書處要成日OT，所以就有人提議精簡扼要委員會嘅會議紀錄，以不記名方式記錄議員嘅意見，而喺第一次12對12票情况下，主席吳仕福以一票贊成，令修訂建議通過。投咗反對票嘅張美雄就覺得做法「倒退」，只會減低議會嘅透明度；但投票支持嘅新民黨區能發就覺得「記名不記名嘅分別不大」，唔使拘泥邊個去提出咩意見。
唯一「棄權」嘅周賢明就話，自己左思右想，擔心區議會資源有限，唔想花太多錢請秘書，但又覺得區議員都要兼顧「言責」，記名先可以同市民交代，所以投咗棄權票，「提出咗我嘅睇法，兩者平衡之間，等大家決定」。
;)
