楊岳橋網上籌款幫補選戰
[2016.01.23] 發表
【明報專訊】立法會選舉開支從來唔係小數目，即將參加新界東補選嘅公民黨楊岳橋，噚日喺facebook專頁公布一個相信係香港前無古人嘅選舉融資方法，就係發起網上小額捐款行動，網民可以選擇捐幾十以至「689」蚊，話希望藉此「對抗」資源充裕嘅對手。
楊岳橋同Emily講，搞補選嘅使費都唔少，所以希望藉住網上籌款幫補吓，但始終都係第一次搞，所以無為籌款金額訂目標。佢又話研究過選舉條例，條文無禁止網上籌款，但自己都會依例將網上籌款嘅支出計埋入選舉開支到。
另邊廂，噚日天文台發咗寒冷天氣警告，同楊岳橋一樣喺fb活躍嘅民建聯候選人周浩鼎，擺街站時拍片上載專頁，呼籲市民做好禦寒措施。佢話雖然天氣愈嚟愈凍，但得到市民支持就幾凍都唔怕咁話。
新界東補選其他候選人包括新思維黃成智、本土民主前線梁天琦、方國珊、梁思豪同劉志成。
更多港聞
相關新聞
