【明報專訊】海洋公園噚日公布壞消息，園內最年長、陪伴無數港人成長嘅印度太平洋樽鼻海豚Jessie，前晚10點半安詳逝世，終年44歲。佢喺公園住咗38年，一直照顧佢嘅護理員都好難過。園方話據初步臨牀同解剖結果，Jessie死因係嚴重腎功能衰竭同腹膜炎，但仲要詳細化驗先知道結果。

腎衰竭及腹膜炎

Jessie上星期六開始食慾下降，到前日朝早仍未有好轉，驗血後發現佢患上嚴重突發性腎衰竭，情况危殆，獸醫即搶救，但情况持續惡化。研究顯示，野外嘅印度太平洋樽鼻海豚最長命有37歲，而Jessie終年44歲，算係長壽。

海洋公園上下都對Jessie逝世感到難過，睇番資料，Jessie喺1978年1月由台灣澎湖列島來港，當時佢大約5、6歲，佢加入海洋公園後曾經參與海洋劇場活動，並對科研工作貢獻良多，佢個女Maya今年都年滿15歲喇。

1978年來港 曾參與海洋劇場

海洋公園動物及教育部執行總監蔣素珊話，Jessie係一條充滿力量同活力嘅海豚，喺同伴中擔當重要領導角色，多年來佢貪玩活潑嘅性格獲得園內嘅人愛戴。海洋公園今日起設悼念板，等大家可以向Jessie作最後致意。另外，海洋公園一條7歲娃娃魚亦喺前日離世，死因有待確認。