【明報專訊】藝人「阿叻」陳百祥言論向來惹火，早前佢喺香港電台節目《我係乜乜乜》大談新世代，點名批評學民思潮召集人黃之鋒連「八間大學」都考唔入，「咁我點話你叻？」，引嚟網民極大反響。不過就因為呢番話，阿叻近來成為政圈界紅人，除獲自由黨青年團邀請，成為佢哋定期聚會嘅座上客，分享時政看法，前晚出席港區人大代表王庭聰嫁女婚宴時，又被立法會議員瘋狂集郵。 民建聯陳恒鑌噚日就喺facebook上載當晚同阿叻嘅自拍照，留言話﹕「誰說香港無叻人？叻哥一開咪，已勁受關注，我見到他，梗係不忘追下星啦！」相中除咗阿叻夫婦，仲有民建聯副主席陳克勤，同港鐵候任主席馬時亨。 陳恒鑌話，自己特意拉埋「Fit馬(馬時亨)」一齊影相，要請縱橫馬場多年嘅阿叻睇睇Fit馬哥，「跑數得吾(唔)得，跑吾(唔)跑到196億高鐵賠率！」唔知馬時亨有無乘機向陳恒鑌游說，叫佢稍後喺立法會財委會支持批出196億元高鐵超支撥款呢？
|
| |
| |
;){kind=small}
;)
