【明報專訊】民建聯立法會議員陳克勤噚日提出「發展經濟，改善民生」議案，點知又再一次發生投票「甩轆」事件，令呢個無咩爭議嘅議案差一票通過唔到。話說工聯會立法會議員王國興(圖)喺會上發言不斷批評有泛民拉布、浪費公帑，但講完就走咗。到咗表決嘅時候，社民連梁國雄覺得王國興既然咁關心呢個議題，就決定要「等埋王國興」投票，等表決鐘響5分鐘召喚議員返嚟投票，可惜王國興最終都無現身。議案喺分組點票下，就因為欠咗地區直選一票否決咗，人民力量陳偉業會後大笑，話今次就係差王國興一票。 其實噚日除咗王國興，都有唔少直選議員無現身，例如公民黨毛孟靜、民建聯梁志祥同獨立謝偉俊等。 曾主席會內教語文 梁繼昌多謝 另外，立法會主席曾鈺成主持立法會大會，噚日仲兼職做埋語文教師，教立法會議員希臘文。話說會計界議員梁繼昌就議案發言，引述國父孫中山話「政治係眾人之事」，同「政治」嘅英文politics相呼應，因為politics係源自古希臘文「poly」，「好多人嘅意思」。但曾主席就糾正話，politics應該源自希臘文「polis」，意指「城市」。曾主席又糾正發音，話指希臘中嘅「臘」，應讀作臘肉嘅臘，而唔係獵人嘅獵。 梁繼昌喺facebook回應話個討論好有意思，多謝主席的意見，「我虛心接受。今朝太累了，抱歉！」
|
| |
| |
;){kind=small}
;)
