【明報專訊】廉政公署喺今個月舉辦咗第35期總調查主任指揮課程，有30個來自21個國家嘅執法機構成員參與，連美國聯邦調查局(FBI)、內地檢察院都有派人參加，香港廉署、多個紀律部隊等機構共派15人參加。計劃為期1個月，除咗唔少人中學都玩過嘅領袖訓練營，亦會去福建廈門市嘅相關機構交流，同埋有政界名人分享，包括立法會主席曾鈺成、行政會議召集人林煥光、競爭事務委員會主席胡紅玉等。

Emily噚日同部分學員傾過偈，廉署總調查主任張健寧話，學員所屬嘅國家同地區法制雖然唔同，覺得課程可以幫助「知己知彼」，透過溝通同交流，可以知道對口單位，第時有咩案件要合作或者協助，溝通都可以順利啲。近年內地大力打貪，佢話交流之後，對內地以民為本嘅反貪政策印象深刻，例如食物安全如果出現問題，當地檢察院都會重點出擊，睇下有無涉及貪污。