【明報專訊】香港有唔少人鍾意足球，好似南華中學教師兼校隊教練黃智偉(Gabriel)，就係典型波牛。佢由細到大掛住踢波，搞到讀書成績麻麻，公開試失敗，後來發憤考番個學位當教師。不過佢並無放棄足球，仲好努力咁赴英考埋足球教練資格，目的都係想話畀一班學生知道，人生有挫敗唔緊要，因為失敗反而係第日成功嘅經驗。

34歲嘅Gabriel細個時成日流連球場，第一次會考只有7分，之後發憤讀書，由重讀中五到副學士，再到公開大學考取教育學士。其間佢無放棄足球運動，學成後去咗教書，仲帶埋校隊。

南華中學喺深水埗，有唔少基層學生，Gabriel就希望用足球教化學生﹕「學生留喺校內踢波總比喺街上逛安全！」佢亦希望學生喺足球場上重拾自信。但Gabriel都覺得自己教練料子有限，幸偶然間知道馬會接觸學校，邀請學校加入「賽馬會足球學界發展計劃」，安排英超勁旅曼聯嘅足球訓練學校教練嚟訓練教師，令佢好雀躍。

Gabriel先喺香港接受5個月訓練，去年赴英國考核，終於同另外6個香港學員一樣，攞到曼聯足球學校教練資格，𠵱家可以將足球技巧傳授畀學生。