【明報專訊】市民用智能手機最怕係唔小心「跣手」令手機跌落地，唯有買塊好啲嘅保護貼避免刮花，iPhone同三星等手機廠都積極研發更硬及更抗刮嘅屏幕材料。香港浸會大學物理系嘅學者團隊噚日就宣布一項研究，成功開發新納米物料「鐵甲玻璃」(ArmoGlassR)，話特性超硬、強韌同埋抗刮，有望成為輕觸顯示屏嘅新材料。

新納米物料抗刮 平藍光玻璃一半

目前顯示屏物料，最堅硬可謂蘋果專利藍寶石玻璃，但生產成本高，只有iPhone用喺鏡頭同最貴嘅Apple Watch版本上。

浸大物理系講座教授謝國偉教授就大讚佢哋成功開發嘅鐵甲玻璃，硬度可媲美單晶寶石，可同石英、矽等結合後鍍於基板上製成屏幕。「鐵甲玻璃」原理，係喺一般玻璃上鍍上一層超薄材料，再進行特別硬化處理技術。

謝國偉話，每塊「鐵甲玻璃」量產後額外成本低於100蚊港元，較要差唔多40美元(312港元)嘅藍光玻璃平一半，笑住話平過貼Mon貼。佢又話，已經受創新科技署資助成立一間公司，將科研成果商品化，並已投入試驗生產，向美國申請專利，希望打入手機製造市場。