陳健波鬧大嚿人渣
表決期間離開講電話被窒
[2015.05.23] 發表
【明報專訊】立法會過去3日，都繼續審議財政預算案，表決由泛民議員提出嘅600幾項修正案，原本預計噚日可以完成，但3日以嚟多次因為唔夠法定人數，需要鳴鐘叫議員歸位，?家仲有19項修正案要等到下個星期再表決。噚日立法會主席曾鈺成更加點名叫保險界陳健波返番議事廳投票，最終又引發陳健波同人民力量陳偉業鬧交。
被催開會 嘲「按傻仔鐘」
話說噚曾鈺成已多次叫議員盡量唔好離開座位，因為唔止一次因有一個人走開就立即唔夠人，而陳健波因為要聽電話行出會議廳，畀曾主席點名要求佢返入去表決，陳偉業就立即話，呢啲係「保皇黨」表現，陳健波就反擊對方「人渣」，其他建制派亦起哄，要曾主席要求大家收口，先至停止罵戰。
陳健波怒氣未息，向記者批評所有議員都有出糧，應該要出席會議做嘢，投票唔止係建制派嘅工作，又話市民要反思點解議會咁荒謬、無聊，形容「唔夠一半人喺度按傻仔鐘」，不斷否決修正案，又話香港長此落去都唔會有運行。
陳健波咁勇猛同泛民駁火，已經唔係第一次。噚日下晝召開內委會，唔少建制派議員都同佢打氣，大讚陳健波鬧得好。
更多港聞
【明報專訊】新界社團聯會唔經唔覺成立30年，地區工作愈來愈犀利，噚日佢哋舉行30周年會慶，中聯辦主任張曉明、署理特首林鄭月娥同多名局長都有出...
詳情
相關新聞
