大嘥鬼變慳神 宣傳節能
[2015.05.16] 發表
【明報專訊】環境局長黃錦星噚日為「全民節能」運動主持啟動禮，請來深入民心嘅大嘥鬼幫手宣傳，但大嘥鬼唔係叫市民唔好浪費食物嘅咩？點解會喺節能活動出現？司儀解釋，原來大嘥鬼辦事不力，叫市民咪嘥嘢，自己卻戒唔到嘥嘢嘅陋習，所以被罰進修，其間大嘥鬼會多咗個名叫「慳神」(Hanson)，除咗勤練節能招式，仲會出席唔同場合幫手宣傳，叫市民唔好嘥電。
慳神出席節能活動時，胸前會多咗個開關掣，提醒市民唔用嘅電器應同時熄開關掣，減少消耗備用電，睇落有啲似咸蛋超人心口盞燈，不過係綠色嘅。慳神噚日以新形象出現，示範嘥電壞習慣，不惜淪為沙包，例如台上螢光幕顯示﹕冷氣溫度太低，戴咗拳套嘅黃錦星就作狀一拳打落去。
室內溫度節能約章 參與率升四成
講返「全民節能」運動，主打係2012年已推出嘅「室內溫度節能約章」，至今有近2800個商場、辦公大樓及屋苑等參加，參與率較去年升咗近四成；其他項目包括機電署啟動「全民節能」網站，逾50個機構參與，提供節能資訊，另機電署亦會舉辦「新能源新世代太陽能車比賽」、「慳電熄一熄青年獎」等，詳情可瀏覽www.energysaving.gov.hk網站。
更多港聞
【明報專訊】官員坐開篷巴士落區宣傳政改，泛民就決定今個月24號踩單車落區宣傳反「袋住先」。呢個宣傳方式由熱愛運動嘅民主黨胡志偉建議。當日單車...
詳情
相關新聞
