經濟依賴中國 貢獻比例大減
香港有幾多牙力？
「你睇，老董又嚟喇﹗」前特首董建華今次見傳媒，雖然感覺仍囉囉唆唆，但清楚發表了兩個重要信息：(一)阿爺堅持通過政改，緊繫香港經濟發展命脈，簡單來說，唔過方案，香港仆直；(二)反共人士不能出閘選特首，這個公開的秘密，終於由一名被視為習大大傳聲筒的政協副主席說出來，而卻沒有引起社會強烈反彈。
阿爺講出口 要泛民懸崖勒馬
中國在世界話語權愈來愈大，香港作為國際窗口的角色，漸漸褪色，董建華表示，香港GDP佔中國GDP的比例愈來愈小，香港要反思自己對國家而言，還有什麼作用，這是一個現實。
筆者認為，今次阿爺打開天窗說亮話，就係要泛民懸崖勒馬；而反叛嘅田大少及時宣布，贊助港大做政改民調，或者呢個係通過方案的一個契機，因為香港，沒有輸的本錢。
聽到董生話香港GDP佔中國GDP比例日後可能得零點幾的百分比後，筆者有位商界中環友話唔覺得出奇，事關佢早於舊年年底，收到同事提交的數據，仲整埋個圖(右圖)，顯示現實係幾咁恐怖。
佢話，?家世界變晒，香港唔可以話不用靠中國，因為當香港經濟對中國依賴度愈來愈高的同時，香港的貢獻卻愈來愈少，呢種局面，喺博弈論上面，香港係完全無牙力的。
筆者見到個圖，都嚇咗一跳，即刻偷影，畀大家參考吓。或者有人會話，唔過政改，最多咪原地踏步，香港點解會仆直？筆者都唔知點講好，但好明白「敬酒唔飲飲罰酒」的道理。
政改前夕，阿爺做好個市，大家心中有數。有個中資投行嘅老友最近非常風騷，鬼咩，舊年因為做咗幾單中企IPO大刁，非常和味，平均花紅每人都有一年人工。
中資投行風光 花紅成一年人工
佢話最諷刺係，佢哋公布花紅當日，樓下嘅澳資投行宣布裁員，簡直係天堂與地獄。?家凡係要籌旗，中資行抽水能力都相當高，因為當傳統歐美行仲只係搵既有大客科水嘅時候，中資行往往可以搵到新嘅隱形大陸富豪，好快可以達標。
藝術品市淡靜 土豪不復勇
不過咁，中資投行風光，不能完全反映實體經濟。中國經濟今年能否「保七」，筆者大陸好多朋友都唔睇好，一位鍾意玩字畫嘅朋友就話，最近一年北京嘅藝術品市場交投淡靜，好多當年被炒到天價嘅畫家作品，已經相繼爆煲，情况就好似幾年前嘅紅酒市場一樣。呢個老友話，幾年前大陸藝術品拍賣會，好靠一班忽然富貴嘅煤礦老闆炒起，但如今拍賣場已好少見呢班土豪。
阿爺面對經濟下行風險，都堅持用政策主導炒起股市製造財富效應，真係「用心良苦」呀﹗而下一步值得留意的，就係樓市。
係人都知樓市泡沫可以創造財富效應，要借樓市泡沫撐起經濟，對阿爺而言，必然有吸引力。但若果放寬政策，樓市一旦飈升，就唔係你想升幾多，到價就自然會停，樓市若不受控，不單只泡沫爆破死得人多，政治上嘅風險亦非常高危，呢把雙刃劍，不能亂使。學誠哥話齋，各位想買磚頭或在股海翻滾嘅巴打，「量力而為」啦﹗
至於政改袋唔袋住先？即管睇下鍾庭耀嘅民調。
每日股市基金行情請點擊這裡獲得詳細資訊。
