高永文為陳志全慶生
[2015.04.17] 發表
【明報專訊】立法會噚日繼續辯論財政預算案，但點人數嘅鐘聲就無乜響起，唔少議員可能都覺得幾輕鬆，相信食物及衛生局長高永文都有功勞。此話何解？其實因為拉布要員、人民力量議員陳志全(中)噚日正日生日，雖然都要出席立法會，但中午就有高醫生(右)同佢嘅政治助理陳凱欣(左)請佢出去食飯，仲影埋合照吹蠟燭，所以話政治上係無永遠嘅敵人嘅。
公民黨郭榮鏗前日就37歲生日，佢班助理亦有同佢慶祝，班助理仲好有心，或者覺得老闆鬼仔性格，唔識太多俗語，不時讀錯字，就特登送上一本次文化堂出嘅《廣東俗語正字考》嘅書，郭榮鏗就話會學吓書中啲字點讀喇。前日亦係工聯會郭偉強生日，咁即係37歲嘅郭偉強同郭榮鏗係同年同月同日生？
(陳志全facebook)
更多港聞
相關新聞
