【明報專訊】膠袋費今日起全面實施，本報之前披露衛訊嘅銷售系統設定係「免收毫子」，最低收費1蚊，所以向攞1個膠袋嘅顧客收1蚊後找5毫。原本今日起喺舖面擺放「地球之友」捐款箱，鼓勵顧客自願捐出找贖，不過，地球之友總幹事劉祉鋒(Edwin)同Emily講，噚日決定擱置喺衛訊擺捐款箱，擔心捐款箱同膠袋費掛鈎，顧客覺得「被迫」捐錢，令地球之友形象負面，又引述衛訊話唔會將收到嘅膠袋費捐畀地球之友。
Edwin話個幾月前同衛訊傾捐款時，唔清楚捐款原來同膠袋費掛鈎，亦唔明點解衛訊唔收足1蚊膠袋費，「啲客畀完錢攞咗收據就會走……(銷售系統)收唔到毫子，咪收足1蚊(膠袋費)，仲可更鼓勵顧客帶購物袋」。Emily噚日打畀衛訊了解情况，至截稿前未有回覆。
;)
