大輝叫大嚿小心「天誅地滅」

【明報專訊】上個禮拜爆出行會成員羅范椒芬，因為不滿人民力量陳偉業(大嚿)打算喺財委會審議創科局撥款時「拉布」，於是發短訊話「傷害無辜者，天誅地滅」，點知「天誅地滅」呢幾個字噚日喺立法會出現。事緣陳偉業喺經濟發展事務委員會會議上批評「自由行禍港」，仲叫旅發局唔好再去內地城市宣傳香港，但議員林大輝爭取最後一條問題嘅機會時就抽水話，「陳偉業可能最近畀羅范椒芬訓示得多」，所以講嘢「有啲思覺失調」。大輝話自由行旅客一再被罵，其實係「代罪羔羊、無辜者」，仲話「呢啲無辜者仲畀陳偉業咁話法，我小心佢天誅地滅呀」。

大輝話自由行計劃本身無錯，只係因為無與時並進檢討同優化，先會引起市民不滿，佢話政府應該盡快就問題訂出明確政策，而唔係喺平衡民生同經濟嘅兩難中不斷「等運到」，否則自由行旅客同市民嘅衝突只會無日無之。