【明報專訊】佔中運動規模龐大，國際傳媒近日都好多篇幅報道，運動嘅主要人物亦成為訪問對象，好似噚日《紐約時報》就以專題形式介紹學民思潮召集人黃之鋒，仲喺網上版配以長約4分鐘嘅短片，報道過去幾個月黃之鋒嘅變化，又記錄佢上周被警察拘捕，到前日去睇國慶升旗嘅過程。

記錄之鋒數月社運史

專題名為At 17, Setting Off Protests That Roil Hong kong(17歲，掀起攪動香港的抗爭)，文章首段形容戴住重甸甸方框眼鏡、留咗個湯碗頭嘅之鋒係今次民主運動嘅中心人物，仲搵學者及議員，講之鋒好緊要。訪問片段就由幾個月前之鋒受訪開始，問佢點解搞社運，到最新片段，學民仔10月1日朝早去灣仔會展外升旗禮，以交叉手回應升國旗。之鋒話聽到國歌「好憤怒」，因為歌詞話「起來！不願做奴隸的人們！」但係港人想爭取公民提名就唔得，訪問中佢又重提要特首梁振英辭職嘅要求，話咁先係「當務之急」。文章當然係英文，訪問片段就係廣東話配上英文字幕。