【明報專訊】中港矛盾加劇，令最近有唔少負面事件嘅港鐵又「中箭」。網上盛傳港鐵推出新優惠，內地居民經落馬洲站來港可享半價優惠，隨即引起網民反彈。新民主同盟喺社交網站貼出新優惠嘅傳單，抗議港鐵資助自由行、一簽多行來港，要求港鐵撤回優惠云云。

觀塘將軍澳線部分站亦半價

Emily問過港鐵，對方證實新優惠聽日起至明年1月26號實施，持自由行通行證嘅內地居民，只要朝早9點後喺落馬洲站入閘前，到客戶中心出示優惠券，可享半價優惠；不過港人同樣有呢個優惠，下周一至明年1月25號期間喺九龍灣、牛頭角、觀塘、藍田、油塘、調景嶺、將軍澳、寶琳、坑口或康城上車前，到客戶中心出示八達通即可享半價。港鐵澄清話新優惠唔係首次出爐，只係以往惠及其他車站入閘嘅乘客，今次希望提高落馬洲站嘅客量。