【明報專訊】「淋冰水」做善事嘅「冰桶挑戰」(Ice Bucket Challenge)已經喺香港遍地開花，噚日有多個政界人士都玩埋一份，包括行政會議成員陳智思，建制派就有經民聯林健鋒、梁君彥同梁美芬，泛民就有民主黨何俊仁同單仲偕完成挑戰。旅發局主席林建岳應商經局長蘇錦樑邀請，著晒防水風褸「找數」，笑住話自己咁密實係「驚走光」，仲趁機「賣廣告」話?家旅遊業已經進入「冰凍時期」，政府要多啲做嘢咁話。

林建鋒挑戰佔中三子

建制同泛民議員雖然派別唔同，但淋冰嗰時同樣抽「政治水」，林健鋒點名向「佔中三子」挑機，話?家四處火頭，希望用冰水潑熄火頭；何俊仁同單仲偕就點名挑戰政制及內地事務局副局長劉江華、民建聯主席譚耀宗等，話希望各人喺政改問題上保持冷靜頭腦。至於林建岳就點名要求全國政協常委唐英年、中華廠商聯合會會長施榮懷同藝人曾志偉接受挑戰。

至於網絡紅人學者沈旭暉就喺facebook改玩法，變成「浸浴缸」拍片。佢解釋，自己認同活動可以引起各界對ALS(肌萎縮性脊髓側索硬化症)病人關注，但佢「對活動有一點保留」，包括因為運動嚟到香港有啲變質，美國公眾人物喺做善事面前，盡量唔講政見或者利益分歧，有一定「包容」文化，但香港就無乜呢種文化，政治人物容易喺過程抽「政治水」咁話。